ترک آذربایجانلی فعاللار عباس لسانی، علی خیرجو، یوسف کاری و بهزاد دشتی قاضی محمدرضا عموزادین رئیسلیک ائتدیگی تهران اینقلاب محکمه‌سینین ۲۸-نجی شعبه‌سی طرفیندن جمعاً ۴۰ ایل حبسه محکوم اولوبلار.
حکم یازیلی بیلدیریش اولمادان، حضوری شکیلده ایشین وکیلینه چاتدیریلیب. وکیلین آلدیغی رونوشته گؤره، بو دؤرد فعالین هامیسی «اؤلکه‌نین تهلوکه‌سیزلیگینه قارشی جینایت تؤرتمک اوچون توپلاشما و سازیش» ایتهامی ایله ۵ ایل، عباس لسانی «اؤلکه داخلینده ترک تجزیه‌طلب قروپونون یارادیلماسی و رهبرلیگی» ایتهامی ایله داها ۱۰ ایل، یوسف کاری و بهزاد دشتی ایسه «اؤلکه داخلینده ترک تجزیه‌طلب قروپونا اوزولوک» ایتهامی ایله هر بیری داها ۵ ایل حبسه محکوم اولوبلار.
همچنین، حکمه اساساً عباسین ال تلفونو ضبط ائدیلیب.
عباس لسانی، علی خیرجو، یوسف کاری و بهزاد دشتینین ایشینه باخیش ۲۰۲۶-جی ایلین مایین ۳۰-دا تهران اینقلاب محکمه‌سینین ۲۸-نجی شعبه‌سینده کئچیریلمیشدی. او جلسه‌ده عباس لسانی، یوسف کاری و علی خیرجو محکمه‌ده ایشتیراکدان ایمتینا ائدیب «نمایشی، قاپالی و عادلانه محکمه ملاکلاریندان محروم محکمه‌لرده» ایشتیراک ائتمه‌یه‌جکلرینی بیلدیریبلر.
بو دؤرد مدنی فعال ۲۰۲۵-جی ایلین نویابرین ۱۱-ده اوین زندانینین قارشیسیندا توتولوبلار. توتولماسیندان بیر نئچه ساعات سونرا اونلار اوین دادسراسینین ۶-نجی سورغو شعبه‌سینه آپاریلیب و اونلارا «قانونسوز قروپ یارادماق یا اونا اوزو اولماق»، «اؤلکه‌نین تهلوکه‌سیزلیگینه قارشی توپلاشما و سازیش» کیمی ایتهاملار ایره‌لی سورولوب.
